विद्यापीठातील विद्यार्थिनींना खुरपायला जाऊ देणार नाही! - आमदार सतीश चव्हाण

31 Oct 2018 , 09:45:13 PM

विद्यार्थिनींना खुरपण्याची कामं दिली जातात. डॉ.बाबासाहेब आंबेडकर मराठवाडा विद्यापीठात हे घडतंय. कमवा व शिका योजनेअंतर्गत काम करणार्याज सार्वाधिक विद्यार्थीनी ग्रामीण भागातल्या आहेत. या विद्यार्थीनी गावी हेच काम करीत होत्या अन् आता विद्यापीठात पुन्हा हेच काम करावं लागतंय.
मराठवाडा पदवीधर मतदारसंघाचे आमदार सतीश चव्हाण यांनी मात्र या विद्यार्थिनींच्या समस्या जाणून विद्यापीठ प्रशासनाला खणखणीत इशारा दिला आहे. या विद्यार्थीनींना यापुढे कौशल्यावर आधारीत काम द्यावे. कुठल्याही परिस्थितीत विद्यापीठातील मुलींना खुरपायला जावू देणार नाही, असं त्यांनी प्रशासनाला खडसावून सांगितलं.

डॉ. बाबासाहेब आंबेडकर मराठवाडा विद्यापीठात आज आमदार सतीश चव्हाण यांनी भेट देऊन तेथील विद्यार्थ्यांच्या अडीअडचणी समजून घेतल्या. यासंदर्भात विद्यापीठाचे कुलगुरू डॉ. बी. ए. चोपडे यांची भेट घेण्याचा प्रयत्न केला असता ते विद्यापीठात उपलब्ध नव्हते. त्यामुळे विद्यापीठाचे प्रकुलगुरू डॉ. अशोक तेजणकर यांची भेट घेऊन विद्यार्थ्यांच्या अडी-अडचणी त्यांच्या निर्दशनास आणून देत विद्यार्थ्यांचे प्रश्न त्वरित मार्गी लावावेत, अशी आग्रही मागणी केली. त्यात प्रामुख्याने कमवा व शिका योजनेत काम करणार्यात विद्यार्थिनींना विद्यापीठात खुरपणी करण्याचे काम दिले जाते. कमवा व शिका योजनेत काम करणार्याम विद्यार्थींनींना परीक्षेच्या काळात सुद्धा सकाळी ७ ते ९ वाजेपर्यंत काम करून १० वाजता परीक्षेला जावे लागते. त्यामुळे अशा विद्यार्थीनींना परीक्षेच्या दिवशी सुटी देऊन त्या दिवसाचे त्यांना मानधन देण्यात यावे, विद्यापीठातील वसतिगृहात मेस सुरू करावी, सर्वच वसतिगृहात पिण्याच्या पाण्याचा प्रश्न भेडसावत असल्याने त्यासाठी कायमस्वरूपी योग्य ती उपाययोजना करावी, विद्यापीठातील आरोग्य केंद्रास महिला आरोग्य अधिकारी नेमून त्याठिकाणी विविध सोई-सुविधा उपलब्ध करून द्याव्यात, अशा प्रमुख मागण्या त्यांनी प्रकुलगुरूंकडे केल्या.

यावेळी विद्यापीठाचे व्यवस्थापन परिषद सदस्य डॉ. फुलचंद सलामपुरे, किशोर शितोळे, सिनेट सदस्य डॉ. राम चव्हाण, डॉ. स्मिता अवचार, डॉ. विलास खंदारे, प्रा. सुनील मगरे, डॉ. भारत खैरनार, शेख जहूर, राष्ट्रवादी विद्यार्थी काँग्रेसचे शहराध्यक्ष मयूर सोनवणे, अमोल दांडगे, अक्षय पाटील, दीपक बहीर, रविराज काळे, दीक्षा पवार आदींची प्रमुख उपस्थिती होती.


संबंधित लेख