शरद पवार यांनी माझं बोट पकडून मला शेतीचे धडे दिले आहेत - पंतप्रधान नरेंद्र मोदी

14 Nov 2016 , 10:38:13 PM

पुणे येथील वसंतदादा शुगर इन्स्टिट्यूटमध्ये पंतप्रधान रेंद्र मोदी यांनी ऊस पीक प्रात्यक्षिक क्षेत्राची पाहणी करून ऊस लागवडीच्या नवीन तंत्रज्ञानाची तपशीलवार माहिती घेऊन चर्चा केली. वसंतदादा शुगर इन्स्टिट्यूटचे संस्थापक अध्यक्ष, महाराष्ट्राचे माजी मुख्यमंत्री कै. वसंतदादा पाटील यांच्या जन्मशताब्दी वर्षानिमित्त संस्थेच्यावतीने आयोजित 'शुगरकेन व्हॅल्यू चेन-व्हिजन २०२५ शुगर' या आंतरराष्ट्रीय परिषदेचे आयोजन करण्यात आले होते. यावेळी त्यांच्यासोबत राज्यपाल सी. विद्यासागर राव, मुख्यमंत्री देवेंद्र फडणवीस वसंतदादा शुगर इन्स्टिट्यूटचे अध्यक्ष माजी केंद्रीय मंत्री खासदार शरद पवार उपस्थित होते.

याप्रसंगी बोलताना पंतप्रधानांनी शरद पवार यांची कृषी क्षेत्रातील योगदानाबाबत स्तुती केली. पवार कितीही दमलेले असले तरी शेतीचा प्रश्न समोर आल्यावर तो ते आपुलकीने सोडवतात. शरद पवार यांनी माझं बोट पकडून कायम मला शेतीचे धडे दिले आहेत, असे वक्तव्य मोदी यांनी याठिकाणी केले. तसेच सार्वजनिक आयुष्याची ५० वर्षे पूर्ण केल्याबद्दल त्यांनी पवार यांचे अभिनंदन केले.

या कार्यक्रमात बोलताना शरद पवार यांनी देशाचे पंतप्रधान ज्या पद्धतीने काम करतात त्याबद्दल आश्चर्य व्यक्त केले. वसंतदादा शुगर इन्स्टिट्यूट संशोधन आणि विकासाचे कार्य करत आहे त्यामुळे केंद्र सरकारने या संस्थेला मदत करावी, अशी मागणी केली. तसेच, ऊस उत्पादक आणि साखर कारखानदार एकत्र कसे काम करतील यासाठी सरकारने धोरण ठरवणे आवश्यक आहे, असे वक्तव्यही पवार यांनी याठिकाणी केले.

ऊसाच्या लागवडीतील नवीन तंत्रज्ञानाविषयी, नवीन बियाण्यांविषयी, खतांविषयी तसेच ऊस पिकाच्या नवीन तंत्रज्ञानाविषयी मोदी यांनी संस्थेच्या संशोधकांकडून माहिती घेतली. यावेळी त्यांच्या सोबत केंद्रीय मंत्री, पालकमंत्री गिरीश बापट, संस्थेचे महासंचालक शिवाजीराव देशमुख उपस्थित होते.⁠⁠⁠⁠

संबंधित लेख