राष्ट्रवादी काँग्रेस पार्टी

‘प्रत्येक शेतक-याची तूर खरेदी होईपर्यंत तूर खरेदी केंद्र सुरू ठेवा’ - धनंजय मुंडे

21 May 2018 , 07:06:10 PM

राज्यातील हजारो शेतकऱ्यांची लाखो क्विंटल तूर खरेदी अभावी खरेदी केंद्रावर पडून असल्यामुळे शेतकरी हवालदिल झाले आहेत. त्यामुळे तूर खरेदी योजनेस मुदतवाढ देऊन प्रत्येक शेतकऱ्याची तूर खरेदी होत नाही, तोपर्यंत खरेदी केंद्र सुरू ठेवण्याची मागणी विधान परिषदेचे विरोधी पक्षनेते धनंजय मुंडे यांनी केली. यासंदर्भात त्यांनी मुख्यमंत्री देवेंद्र फडणवीस यांना एक पत्रही लिहिले आहे. राज्य शासनाने बाजार हस्तक्षेप योजनेतून तूर खरेदीचा निर्णय घेतला आहे. सुरुवातीला १८ एप्रिल पर्यंत तूर खरेदी मुदत होती, परंतु मुदत संपल्यानंतर लोकप्रतिनिधींनी आणि शेतकऱ्यांनी मागणी केल्यामुळे ही मुदत १५ मे पर्यंत वाढविण्यात आली. मात्र वाढीव मुदतीत बारदान्याचा तुटवडा, तूर साठवण्यासाठी गोदामांची अनुपलब्धता यासारख्या अडचणींमुळे तूर खरेदी होऊ शकली नाही. परिणामी अनेक जिल्ह्यातील शेतकऱ्यांची लाखो क्विंटल तूर खरेदी अभावी आजही खरेदी केंद्रांवर तशीच पडून आहे.

राज्यशासनाने तूर खरेदी केल्यानंतर कदाचित बाजारातील भाव वाढेल अशी शेतकऱ्यांना अपेक्षा होती मात्र बाजारपेठेतील तुरीचे भाव वाढलेले नाहीत. त्यामुळे राज्यातील तूर उत्पादक शेतकऱ्यांना शासकीय खरेदी केंद्राशिवाय पर्याय राहिला नाही. अनेक ठिकाणी शेतकऱ्यांनी नोंदणी केली असली तरी शासनाने दिलेल्या मुदतीत मोजमाप होऊ न शकल्यामुळे अपेक्षा असलेल्या शेतकऱ्यांच्या पदरी निराशा आली आहे.

या सर्व परिस्थितीचा विचार करून प्रत्येक शेतकऱ्याची तूर खरेदी होत नाही तोपर्यंत शासनाने या योजनेस मुदतवाढ देण्याचा निर्णय तातडीने घ्यावा आणि शेवटच्या शेतकऱ्याची तूर खरेदी होत नाही तोपर्यंत हे केंद्र सुरूच ठेवून शेतकऱ्यांना दिलासा द्यावा अशी मागणी मुंडे यांनी या पत्रामध्ये केली आहे.

संबंधित लेख